ಒಂದು ವೇಳೆ ಇದು ಆಗದೇ ಇದ್ದರೆ ಆಗ ದೇಹದಲ್ಲಿ ಏನಾದರೂ ಸಮಸ್ಯೆ ಇರಬಹುದು ಎಂಬ ಶಂಕೆ ಬರುತ್ತದೆ. ತಕ್ಷಣವೇ ವೈದ್ಯರ ಬಳಿ ಪರೀಕ್ಷೆ ಮಾಡಿಸಿಕೊಂಡರೆ ಮತ್ತು ಚಿಕಿತ್ಸೆ ಪಡೆದುಕೊಂಡರೆ ದೊಡ್ಡದಾಗುವ ಆರೋಗ್ಯ ಸಮಸ್ಯೆಯನ್ನು ಆರಂಭದಲ್ಲಿಯೇ ಮಟ್ಟ ಹಾಕಬಹುದು.
ಇಂತಹ ಒಂದು ಆರೋಗ್ಯ ಸಮಸ್ಯೆಗೆ ಉದಾಹರಣೆಯಾಗಿ ಇಂದು ಥೈರಾಯ್ಡ್ ಹಾರ್ಮೋನಿನ ಅಸಮತೋಲನ ಜನರಲ್ಲಿ ಹೆಚ್ಚಾಗಿ ಕಾಡುತ್ತಿದೆ. ಕೆಲವರಿಗೆ ದೇಹದಲ್ಲಿ ಥೈರಾಯ್ಡ್ ಹಾರ್ಮೋನ್ ಹೆಚ್ಚಿನ ಪ್ರಮಾಣದಲ್ಲಿ ಉತ್ಪತ್ತಿಯಾದರೆ ಇನ್ನು ಕೆಲವರಿಗೆ ದಿನದ ಅಗತ್ಯತೆಗೆ ತಕ್ಕಂತೆ ಬೇಕಾದ ಮಟ್ಟದಲ್ಲಿ ಉತ್ಪತ್ತಿಯಾಗಲು ಸಹ ಸಾಧ್ಯವಾಗುವುದಿಲ್ಲ.
ಇದನ್ನು ಥೈರಾಯ್ಡ್ ಹಾರ್ಮೋನಿನ ಅಸಮತೋಲನ ಎಂದು ಕರೆಯಬಹುದು. ಇಂತಹ ಸಮಸ್ಯೆಗೆ ನೈಸರ್ಗಿಕವಾದ ಮನೆ ಮದ್ದಿನ ಪ್ರಯೋಗ ಎಂದರೆ ಅದು ಕೊತ್ತಂಬರಿ ಬೀಜಗಳ ಬಳಕೆ. ಬನ್ನಿ ಈ ಲೇಖನದಲ್ಲಿ ಅದರ ಬಗ್ಗೆ ತಿಳಿದುಕೊಳ್ಳೋಣ.
ಹೈಪೋಥೈರಾಯ್ಡಿಸಂ ಸಮಸ್ಯೆ ಎಂದರೇನು?ನಮ್ಮ ದೇಹದ ಕೆಲವೊಂದು ಪ್ರಕ್ರಿಯೆಗಳಿಗೆ ಥೈರಾಯ್ಡ್ ಹಾರ್ಮೋನ್ ಥೈರಾಯ್ಡ್ ಗ್ರಂಥಿ ಇಂದ ಇಂತಿಷ್ಟು ಪ್ರಮಾಣದಲ್ಲಿ ಪ್ರತಿ ದಿನವೂ ಉತ್ಪತ್ತಿ ಆಗಬೇಕು. ಇದು ಆಗದೆ ಇದ್ದಾಗ ವೈದ್ಯಕೀಯ ಭಾಷೆಯಲ್ಲಿ ವ್ಯಕ್ತಿಗೆ ಥೈರಾಯ್ಡ್ ಸಮಸ್ಯೆ ಇದೆ ಎಂದು ಹೇಳುತ್ತಾರೆ.
ಇದನ್ನು ಹೈಪೋಥೈರಾಯಿಡಿಸಂ ಎಂತಲೂ ಕರೆಯುತ್ತಾರೆ. ಪುರುಷರಿಗೆ ಹೋಲಿಸಿದರೆ ಮಹಿಳೆಯರಿಗೆ ಇದರಿಂದ ಹೆಚ್ಚು ತೊಂದರೆ ಎಂದು ತಿಳಿದುಬಂದಿದೆ. ಇದಕ್ಕೆ ಸಂಬಂಧ ಪಟ್ಟಂತೆ ಮಹಿಳೆಯರು ಅಥವಾ ಹೈಪೋಥೈ ರಾಯಿಡಿಸಂ ಇರುವ ಪುರುಷರು ಕೆಲವೊಂದು ರೋಗ ಲಕ್ಷಣಗಳನ್ನು ಅನುಭವಿಸುತ್ತಾರೆ.
ಉದಾಹರಣೆಗೆ ದೇಹದ ತೂಕ ಹೆಚ್ಚಾಗುವುದು, ಮೈಕೈ ನೋವು, ಕೀಲುನೋವು, ಮಾನಸಿಕ ಒತ್ತಡ, ಬಿಸಿ ಹಾಗೂ ತಂಪಿನ ಪ್ರಭಾವಕ್ಕೆ ಹೆಚ್ಚು ಸೂಕ್ಷ್ಮತೆ, ದೇಹದಲ್ಲಿ ಇದ್ದಕ್ಕಿದ್ದಂತೆ ಕೊಲೆಸ್ಟ್ರಾಲ್ ಮಟ್ಟ ಹೆಚ್ಚಾಗುವುದು, ಗಂಟಲು ಬಿಗಿಯಾಗಿ ಹಿಡಿದುಕೊಂಡ ಅನುಭವ ಉಂಟಾಗುವುದು, ಚರ್ಮ ಒಣ ತ್ವಚೆಯಾಗಿ ಬದಲಾಗುವುದು ಮತ್ತು ಕಣ್ಣುಗಳಿಗೆ ಸಂಬಂಧಪಟ್ಟಂತೆ ದೃಷ್ಟಿ ದೋಷ ಎದುರಾಗುವುದು.
ಹೈಪರ್ಥೈರಾಯ್ಡಿಸಂ ಸಮಸ್ಯೆ ಎಂದರೇನು?ಮನುಷ್ಯನ ದೇಹಕ್ಕೆ ಅಗತ್ಯವಾಗಿ ಬೇಕಾದ ಪ್ರಮಾಣದಲ್ಲಿ ಬಿಟ್ಟು ಸ್ವಲ್ಪ ಹೆಚ್ಚಿನ ಪ್ರಮಾಣದಲ್ಲಿ ಉತ್ಪತ್ತಿಯಾಗುವ ಥೈರಾಯ್ಡ ಹಾರ್ಮೋನು ದೇಹದಲ್ಲಿ ಕೆಲವೊಂದು ಆರೋಗ್ಯ ಅಸ್ವಸ್ಥತೆಗಳನ್ನು ಉಂಟುಮಾಡುತ್ತದೆ.ಇದನ್ನು ವೈದ್ಯಕೀಯ ಭಾಷೆಯಲ್ಲಿ ಹೈಪರ್ಥೈರಾಯ್ಡಿಸಂ ಎಂದು ಕರೆಯುತ್ತಾರೆ. ಇದಕ್ಕೆ ಸಂಬಂಧ ಪಟ್ಟಂತೆ ಈ ಸಮಸ್ಯೆ ಎದುರಾಗಿರುವ ಜನರು ಅನುಭವಿಸುವ ಕೆಲವೊಂದು ರೋಗ ಲಕ್ಷಣಗಳು ಎಂದರೆ ಸಣ್ಣಪುಟ್ಟ ವಿಷಯಗಳಿಗೆಲ್ಲ ತುಂಬಾ ಹೆದರಿಕೊಳ್ಳುವುದು, ಚೆನ್ನಾಗಿಯೇ ಇದ್ದ ಹೃದಯ ಬಡಿತ ಇದ್ದಕ್ಕಿದ್ದಂತೆ ಏರುಪೇರಾಗುವುದು, ದೇಹದ ತೂಕ ಕ್ರಮೇಣವಾಗಿ ಕಡಿಮೆಯಾಗುತ್ತ ಬರುವುದು, ಮಾನಸಿಕವಾಗಿ ಸಾಕಷ್ಟು ಬದಲಾವಣೆ ಉಂಟಾಗುವುದು ಇತ್ಯಾದಿ.
ಥೈರಾಯ್ಡ್ ಹಾರ್ಮೋನಿನ ಸಮತೋಲನವನ್ನು ಕಾಪಾಡುವ ಕೊತ್ತಂಬರಿ ಬೀಜಗಳು–ಯಾವುದೇ ಸಂದರ್ಭದಲ್ಲಿ ವ್ಯಕ್ತಿಯ ದೇಹದಲ್ಲಿ ಬದಲಾವಣೆಯಾಗುವ ಥೈರಾಯ್ಡ್ ಹಾರ್ಮೋನಿನ ಪ್ರಭಾವದಿಂದ ಉಂಟಾಗುವ ಹೈಪೋಥೈರಾಯ್ಡಿಸಂ ಮತ್ತು ಹೈಪರ್ಥೈರಾಯ್ಡಿಸಂ ಸಮಸ್ಯೆಯನ್ನು ಅಚ್ಚುಕಟ್ಟಾಗಿ ಸಮತೋಲನಗೊಳಿಸುವ ಗುಣ ಲಕ್ಷಣ ಕೊತ್ತಂಬರಿ ಬೀಜಗಳಲ್ಲಿ ಕಂಡುಬರುತ್ತದೆ.
ನಾವು ಸೇವನೆ ಮಾಡುವ ಆಹಾರ ಪದಾರ್ಥಗಳಲ್ಲಿ ವಿಟಮಿನ್ ಬಿ 12 ಅಂಶದ ಕೊರತೆ ಉಂಟಾದರೆ, ಹೆಚ್ಚಿನ ಪ್ರಮಾಣದಲ್ಲಿ ಅಯೋಡಿನ್ ಅಂಶ ನಮ್ಮ ದೇಹ ಸೇರಿದರೆ, ಥೈರಾಯಿಡ್ ಗ್ರಂಥಿಯ ಭಾಗದಲ್ಲಿ ಕ್ಯಾನ್ಸರ್ ಸಮಸ್ಯೆ ಕಂಡುಬಂದರೆ, ಥೈರಾಯ್ಡ್ ಭಾಗದಲ್ಲಿ ಗಂಟುಗಳು ಉಂಟಾದರೆ ಅಥವಾ ಉರಿಯೂತದ ಸಮಸ್ಯೆ ಇದ್ದರೆ ಅದರಿಂದ ಥೈರಾಯಿಡ್ ಹಾರ್ಮೋನಿನ ಉತ್ಪತ್ತಿಗೆ ಸಾಕಷ್ಟು ತೊಂದರೆ ಎದುರಾಗುತ್ತದೆ.
ಥೈರಾಯ್ಡ್ ಸಮಸ್ಯೆಗೆ ಚಿಕಿತ್ಸೆಗಳು–ವೈದ್ಯಕೀಯ ಲೋಕದಲ್ಲಿ ವಿವಿಧ ಪ್ರಯೋಗಗಳಿಂದ ಈ ಸಮಸ್ಯೆಯನ್ನು ಬಗೆಹರಿಸುವ ಸಾಧ್ಯತೆ ಇದೆ. ಹಾರ್ಮೋನ್ ತೆರಪಿ ಇದರಲ್ಲಿ ಪ್ರಮುಖವಾದ ಒಂದು ಪ್ರಯೋಗ.ಆದರೆ ಥೈರಾಯ್ಡ್ ಹಾರ್ಮೋನಿನ ಸಮಸ್ಯೆ ಹೊಂದಿರುವವರು ಸಂಪೂರ್ಣವಾಗಿ ವೈದ್ಯಕೀಯ ಚಿಕಿತ್ಸೆಗಳ ಮೇಲೆ ಅವಲಂಬಿತವಾಗಬೇಕು ಎಂಬ ನಿಯಮವೇನಿಲ್ಲ.ನೈಸರ್ಗಿಕವಾದ ಹಲವಾರು ವಿಧಾನಗಳಲ್ಲಿ ಕೂಡ ಈ ಸಮಸ್ಯೆಯಿಂದ ಹೊರಬರಬಹುದು. ಇದರಲ್ಲಿ ಪ್ರಮುಖವಾದ ಒಂದು ವಿಧಾನವೆಂದರೆ ಧನಿಯ ಕಾಳುಗಳನ್ನು ನೆನೆಹಾಕಿದ ನೀರು ಸೇವನೆ ಮಾಡುವುದು.
ಇದು ಹಳೆಯ ಕಾಲದ ಪದ್ಧತಿ–ಸಾಕಷ್ಟು ಹಳೆಯ ಕಾಲದಿಂದಲೂ ಸಹ ಈ ಪರಿಹಾರವನ್ನು ಜನರು ಮಾಡಿಕೊಂಡು ಬಂದಿದ್ದಾರೆ. ಆಯುರ್ವೇದದ ಪ್ರಕಾರದಲ್ಲಿ ಈ ಚಿಕಿತ್ಸೆಗೆ ಒಳ್ಳೆಯ ಮಹತ್ವವಿದೆ.ಆಂಟಿಆಕ್ಸಿಡೆಂಟ್ ಅಂಶಗಳು ಮತ್ತು ವಿಟಮಿನ್ ಅಂಶಗಳು ಹೆಚ್ಚಾಗಿರುವ ಕೊತ್ತಂಬರಿ ಬೀಜಗಳು ನೈಸರ್ಗಿಕವಾದ ವಿಧಾನದಲ್ಲಿ ದೇಹದಲ್ಲಿ ಏರುಪೇರು ಉಂಟಾಗುವ ಥೈರಾಯ್ಡ್ ಹಾರ್ಮೋನಿನ ಪ್ರಮಾಣವನ್ನು ಸಮತೋಲನಗೊಳಿಸುತ್ತದೆ.
ಗಮನಿಸಬೇಕಾದ ಅಂಶ–ಇದಕ್ಕಾಗಿ ನೀವು 2 ಟೀ ಚಮಚ ಕೊತ್ತಂಬರಿ ಬೀಜಗಳನ್ನು ಇಡಿ ರಾತ್ರಿ ಒಂದು ಲೋಟ ನೀರಿನಲ್ಲಿ ನೆನೆ ಹಾಕಿ ಬೆಳಗ್ಗೆ ಎದ್ದು ಖಾಲಿ ಹೊಟ್ಟೆಯಲ್ಲಿ ಇದನ್ನು ಸೇವನೆ ಮಾಡಬೇಕು. ಪ್ರತಿ ದಿನ ಈ ರೀತಿ ಮಾಡುತ್ತಾ ಬಂದರೆ ಕ್ರಮೇಣವಾಗಿ ನಿಮ್ಮ ಥೈರಾಯ್ಡ್ ಹಾರ್ಮೋನಿನ ಸಮಸ್ಯೆ ಬಗೆಹರಿಯುತ್ತದೆ.