ತುಪ್ಪ ಒಂದು ಡೈರಿ ಪದಾರ್ಥ. ಕೆಲವರಿಗೆ ಡೈರಿ ಪದಾರ್ಥಗಳ ಅಲರ್ಜಿ. ಅದು ಬೇರೆ ವಿಷಯ ಬಿಡಿ. ತುಪ್ಪದ ಬಗ್ಗೆ ತಪ್ಪು ತಿಳಿದುಕೊಂಡು ಸಂಪೂರ್ಣವಾಗಿ ಆದರಿಂದ ದೂರ ಉಳಿದಿರುವವರು ಸ್ವಲ್ಪ ಆಲೋಚನೆ ಮಾಡಬೇಕು. ಏಕೆಂದರೆ ಎಲ್ಲರಿಗೂ ತುಪ್ಪ ಅನಾರೋಗ್ಯಕರ ಎಂದು ಹೇಳಲು ಬರುವುದಿಲ್ಲ.
ಕೇವಲ ಇದರ ಸೇವನೆಯ ಪ್ರಮಾಣ ಮಾತ್ರ ಗಣನೆಗೆ ಬರುತ್ತದೆ. ಕೆಲವರು ದಿನದ ಮೂರು ಹೊತ್ತು ತುಪ್ಪ ತಿನ್ನುವ ಅಭ್ಯಾಸ ಮಾಡಿಕೊಂಡಿರುತ್ತಾರೆ. ಇನ್ನು ಕೆಲವರು ಹಬ್ಬ ಹರಿದಿನಗಳಲ್ಲಿ ತಯಾರು ಮಾಡುವ ವಿವಿಧ ಬಗೆಯ ಸಿಹಿಯಾದ ಭಕ್ಷ ಭೋಜನಗಳಲ್ಲಿ ತುಪ್ಪದ ಬಳಕೆ ಮಾಡುತ್ತಾರೆ.
ಆದರೆ ಒಂದು ವಿಷಯವನ್ನು ಅರ್ಥಮಾಡಿಕೊಳ್ಳಬೇಕು. ಹೃದಯದ ಸಮಸ್ಯೆ ಇರುವವರಿಗೆ ಬಿಟ್ಟು ಬಾಕಿ ಜನರಿಗೆ ತುಪ್ಪದ ಸೇವನೆಯಿಂದ ಯಾವುದೇ ತೊಂದರೆ ಇಲ್ಲ. ಮಧುಮೇಹ ಸಮಸ್ಯೆ ಹೊಂದಿದ ಜನರಿಗೂ ಕೂಡ ತುಪ್ಪದಿಂದ ಅನೇಕ ಆರೋಗ್ಯ ಪ್ರಯೋಜನಗಳಿವೆ.
ಮಧುಮೇಹಿಗಳಿಗೆ ತುಪ್ಪದ ಆರೋಗ್ಯ ಪ್ರಯೋಜನಗಳು
ತುಪ್ಪ ತಿಂದರೆ ದೇಹದಲ್ಲಿ ಒಳ್ಳೆಯ ಕೊಲೆಸ್ಟ್ರಾಲ್ ಅಂಶದ ಪ್ರಮಾಣ ಹೆಚ್ಚಾಗುತ್ತದೆ. ಹೊಟ್ಟೆ ತುಂಬಿದಂತಹ ಅನುಭವ ಉಂಟಾಗಿ ಸೇವನೆ ಮಾಡಿದ ಆಹಾರ ನಿಧಾನವಾಗಿ ಜೀರ್ಣವಾಗುತ್ತದೆ.
ದೇಹದ ತೂಕ ಕಡಿಮೆ ಮಾಡಿಕೊಳ್ಳಬೇಕು ಎನ್ನುವವರಿಗೆ ಇದು ಒಂದು ಅತ್ಯುತ್ತಮ ಆಯ್ಕೆ ಎಂದು ಹೇಳಬಹುದು. ಮಧುಮೇಹ ಸಮಸ್ಯೆ ಇರುವವರಿಗೆ ಅವರ ರಕ್ತದಲ್ಲಿನ ಸಕ್ಕರೆ ಪ್ರಮಾಣವನ್ನು ನಿಯಂತ್ರಣದಲ್ಲಿ ಇಡುವಂತಹ ಶಕ್ತಿಯನ್ನು ಸಹ ತುಪ್ಪ ಪಡೆದಿದೆ.
ತುಪ್ಪ ಸೇವನೆ ನಿಮ್ಮ ಅಭ್ಯಾಸವಾಗಲಿ
ತುಪ್ಪದಲ್ಲಿ ಆಂಟಿ ಆಕ್ಸಿಡೆಂಟ್ ಅಂಶಗಳ ಪ್ರಮಾಣ ಕೂಡ ಹೆಚ್ಚಾಗಿದ್ದು ಜೊತೆಗೆ ವಿಟಮಿನ್ ಕೆ ಅಂಶ ಕೂಡ ಇರುವುದರಿಂದ ದೇಹದಲ್ಲಿ ರೋಗ ನಿರೋಧಕ ಶಕ್ತಿಯ ಕೊರತೆ ಉಂಟಾಗುವುದಿಲ್ಲ.
ಆಹಾರ ಪದ್ಧತಿಯಲ್ಲಿ ತುಪ್ಪದ ಬಳಕೆ
ಆಹಾರ ಪದ್ಧತಿಯಲ್ಲಿ ತುಪ್ಪದ ಬಳಕೆ ಮಾಡುವುದರಿಂದ ಸೇವನೆ ಮಾಡಿದ ಆಹಾರದಲ್ಲಿ ಕಂಡುಬರುವ ಪೌಷ್ಟಿಕ ಸತ್ವಗಳನ್ನು ದೇಹ ಹೀರಿಕೊಳ್ಳಲು ಹೆಚ್ಚು ಅನುಕೂಲವಾಗುತ್ತದೆ.
ಹಾಗಾಗಿ ಸಾಧ್ಯವಾದಷ್ಟು ನೀವು ಸೇವನೆ ಮಾಡುವ ಕಾರ್ಬೋಹೈಡ್ರೆಟ್ ಅಂಶ ಹೆಚ್ಚಾಗಿರುವ ಆಹಾರಗಳು ಅಂದರೆ ಅನ್ನ, ಚಪಾತಿ, ಪರೋಟ ಇತ್ಯಾದಿಗಳ ಜೊತೆಗೆ ಬಳಕೆ ಮಾಡುವ ಅಭ್ಯಾಸ ಮಾಡಿಕೊಳ್ಳಿ.
ಸಾಧ್ಯ ಆದರೆ ಮನೆಯಲ್ಲಿ ತಯಾರು ಮಾಡಿದ ತುಪ್ಪಕ್ಕೆ ಹೆಚ್ಚಿನ ಆದ್ಯತೆ ಕೊಡಿ. ಏಕೆಂದರೆ ಇದರಲ್ಲಿ ಯಾವುದೇ ಕಲಬೆರಕೆ ಇರುವುದಿಲ್ಲ. ಹೆಚ್ಚು ಸ್ವಾದಿಷ್ಟಕರ ಮತ್ತು ಆರೋಗ್ಯಕರ ಆಗಿರುತ್ತದೆ.
ಗಮನಿಸಬೇಕಾದ ಅಂಶ
ನೀವು ಸೇವನೆ ಮಾಡುವ ತುಪ್ಪದ ಪ್ರಮಾಣದ ಬಗ್ಗೆ ಕಾಳಜಿ ವಹಿಸಲೇಬೇಕು. ಅತಿಯಾದ ತುಪ್ಪ ಸೇವನೆ ಮಾಡಿದರೆ ದೇಹದ ತೂಕ ಹೆಚ್ಚಾಗುವ ಸಾಧ್ಯತೆಯಿದೆ ಮತ್ತು ಮಧುಮೇಹಿಗಳಿಗೆ ಇದರಿಂದ ತೊಂದರೆ ಆದರೂ ಆಗಬಹುದು.
ಹಾಗಾಗಿ ನಿಮ್ಮ ದೇಹದ ಪ್ರಸ್ತುತ ಆರೋಗ್ಯ ಸ್ಥಿತಿಯನ್ನು ವೈದ್ಯರಿಗೆ ವಿವರಿಸಿ ನೀವು ಯಾವ ಪ್ರಮಾಣದಲ್ಲಿ ತುಪ್ಪ ಸೇವನೆ ಮಾಡಬಹುದು ಎಂಬುದನ್ನು ವೈದ್ಯರಿಂದ ತಿಳಿದುಕೊಳ್ಳಿ.